EU ramte'n Afghan refugee 40,000 lak luh remti

European Union member ram 15-te chuan Afhgan raltlan 40,000 lak luh an remti tih Commissioner Ylva Johansson chuan heng ram 15 interior minister-te nena meeting an neih zawhah a puang.

Afghan raltlan lakluh remti zingah Germany ram chuan 25,000 an lalut dawn a, Netherlands-in 3,159, Spain leh France-in 2,500 ve ve leh ramdangin a bak zawng hi an insem ang.

United Nations high commissioner for refugees chuan kum nga chhungin Afghan mi 42,500 lalut turin bloc hi a lo ngen tawh a, mahse member ram 27 zinga ṭhenkhat chuan raltlan lakluh hi an la remti ve lo.

August 15-a Taliban-ten Afghanistan-a thuneihna an chan hnuah Afghan mi tam tak chu ram dangah an tlanchhe tawh a, henga 28,000-te chu EU ram 24-ah an lut an ni. Hetih lai hian Taliban-te hlauh vang te, an rama khawkheng vang tein raltlan hi an la pun belh zel rin a ni.

UNHCR chief Filippo Grandi chuan dinhmun derthawng takah Afghan mi 85,000 an la awm mek thu leh, chenna tur an mamawh thu sawiin, Europe ramte chu heng mipui zinga a zahve tal an rama lalut turin a ngen a ni.