New Zealand-in ṭhangtharte tan cigarette khap dawn

New Zealand chuan an rama meizu zat tihkiam tumin ṭhangtharte tan vaihlo lei khapna dan siam a tum.

He dan hi nakkum June thlaa Parliament session-ah pharh hman a, kumtawpah law-a chantir hman a tum. Kum 2024 aṭangin a tahtawla hman chhoh ṭan a tum bawk a ni.

Dan siam thar turah hian kum 2027 aṭang chuan kum 2008 hnu lama piangte tan cigarette emaw vaihlo aṭanga siam reng reng emaw chu an damchhungin an lei thei dawn lo a ni. Vaihlo zawrh phalna pek pawh tihtlem a ni dawn a, an rama vaihlo siamchhuah leh vaihloa nicotine awm zat pawh tihniam vek a tum bawk.

"Kum naupang zawkte mei zu lo tura kan duh avangin ṭhalai zinga vaihlo aṭanga siamchhuah hralh chhuah chi reng rengte chu dan bawhchhiatnaah kan siam dawn a ni," tiin New Zealand Associate Minister of Health Ayesha Verrall chuan a sawi.

New Zealand mipui kum 15 chunglam zinga 11.6% chuan mei an zu a, ram leilung fa Maori hnam bikah puitling zingah mei zu 29% an awm tih sorkar chhinchhiahna chuan a sawi. Sorkar chuan he dan siam thar a tum chungchangah Maori health task force-te chu biak a tum tih a sawi.