Abbas-an Israel 'Jewish state law' a dem

Israel Parliament-in Israel ram pum Juda ram tia pawmna bill, 'Jewish nation state law' a pawm chu Palesitinian President Mahmoud Abbas chuan a dem thu sawi.

'Jewish nation state' law hian Arabic chu official language atan a pawm lo a, speical status pek a ni chauh tawh dawn a ni. Juda chenna tur in sak chu ram tana thil pawimawh nia tarlan a ni bawk. Hei bakah hian Jerusalem khawpui pum chu Israel ram khawpuiah a puang bawk a ni.

Mahmoud Abbas-a chuan thuchhuah siamin, he dan hian remna leh boruak ṭha a thlen dawn lo tih a saiw a, dan thar pawm chuan Jerusalem dinhmun dik tak, Israel-in Palestinian ram a luahsak a nihna chu a tidanglam chuang lo a ni, a ti.

Israel Parliament-in Juda-te ram ti a Israel ram a puanna bill chu pawm mah se, Palestinian mite chuan Israel-in an ram a luahsak lakkir tuma an beihna te, independent state din an tumna chu an ṭhulh phah dawn lo tih Abbas chuan a sawi bawk. Hemi chungchangah hian ramdangte chu inrawlh a, Israel-in inthliarna dan a kalpui chu titawp tura nawr turin a ngen.

Jewish national state law hi Parliament-a ngaihtuahnaah hian a thlawp lamah vote 62 tlain, a duh lo lamah vote 55 a tla. Pass a nih hnu hian Arab parliament member-te chuan lungawi lohna lantirin bill copy hi an pawtthler a, House aṭangin chhuahtir an ni.

Palestine Liberation Organisation chuan Israel parliament-in a pass thar hi chi inthliarna dan hlauhawm tak a ni tih sawi a, he dan pass tak hian Israel chu chi inthliarna kalpuitu ram a nihzia chiang takin a tilang ta a ni, a ti. Turkey pawhin dan pass thar hi sawiselin, Israeli Arab-te enhranna tur a ni, a ti. Israel-ah hian Israeli Arab hi mi maktaduai riat vel an awm a ni. EU official-te chuan Israel dan siam thar chungchang hi an ngaihven thu leh, Israel official-te an sawipui tur thu an sawi.