Spain-in Puigdemont-a manna tur thupek sut

Spain Supreme Court chuan Catalan president hlui Carles Puigdemont leh a thawhpui mi pangate laka European Arrest Warrant a tihchhuah chu a sut.

Puigemont hi Germany ramah a awm mek a, Spain-in an rama thawn kir tura ngenna chu Germany court chuan a hnawlsak a ni. Spain sorkar chuan Puigdemont hi Spain aṭanga Catalonia bial independence a puan avangin sorkar laipui lakah hela puhin thubuai a siamsak a ni.

Catalan hruaitute laka arrest warrant tihchhuah hi sut ni mah se, sorkar laka hela puhna thubuai erawh siamsak zui zel an la ni dawn a, Spain rama an kir hunah man an ni ang.

Germany-a Schleswig-Holstein regional court chuan Puigdemont-a hi sorkar sum hmang dik loa puhna chungchangah Spain-ah hian an thawn kir thei tih a sawi a, mahse hela puhna thubuai hmachhawn tur erawh chuan an thawn kir dawn lo tih a sawi.

Puigdemont-a hi Catalan independence a puan avangin Spain sorkar chuan hela puhin manna thupek a tichhuak a, hei vang hian Belgium ramah a tlanchhia a ni. Belgium aṭang hian Germany-ah a insawn leh tawh a, bail-a chhuah mek a ni.