Covid vaccine dan duh loin Austria mipuite'n lungawi lohna lantir

Austria sokarin Covid-19 vaccine lak vekna tur dan a siam leh, vaccine la la lote inah inkhungna tur thupek a siam duhloin, Inrinni khan an ram khawpui Vienna-ah mi tam takin lungawi lohna an lantir.

Police-te chuan mipui pungkhawm hi mi 44,000 vel niin an sawi.

Austria sorkar hian November thla khan Covid-19 vaccine lak vekna tur dan hi a siam a, Europe ram zingah he dan siam hmasa ber a ni.

Hri kai an pun chhoh leh avanga sorkarin khuahkhirhna, pawn chhuah khapna siam chu nimin khan a tawp a, vaccine la tawhte chu pawn chhuah phalsak an nih laiin vaccine la lote erawh inah inkhung chhunzawm tura tih an ni. Nakkum February aṭang chuan Austria-a cheng, kum 14 chunglamte chu taksa lama harsatna an nei a nih loh chuan Covid vaccine hi la vek tura tih a ni. Sorkar chuan vaccine hi tihluihna hmangin tumah pek an ni dawn lo a, mahse vaccine la te erawh chu pawisawi chawitirin a tirah euro 600 (USD 670) chawi tir an ni ang a, a hnuah euro 3,600 (USD 4,000) thleng chawitir leh theih an ni ang, a ti.

Hetih lai hian mi tam takin vaccine lak hi an duh lo a, Inrinnia pungkhawmte hian sorkar thupek hi sawiselin, an zalenna hum­him turin an bei zel dawn tih an sawi. Sorkar thiltih dan chu democracy kalphung a ni lo tih an sawi bawk.

Austria mipui zinga 68% te chuan Covid-19 vaccine dose kimin an la tawh a, Europe khawthlang ram zinga vaccine la zat tlem berna zinga mi a ni.