US-a thlipui tlehin chhiatna a thlenah mi 80 chuang thi

US-ah kar liam ta Inrinnia thlipui tlehin chhiatna nasa tak a thlenah mi 80 chuang an thi tawh a, chin hriat lohin mi eng emaw zat awmin thi zat pawh hi an la pun chhoh rin a ni.

Thlipui hian Arkansas, Illinois, Kentucky, Missouri, Mississippi leh Tennessee state-te a nuai a, in tam tak a nuai chhia a ni. Kentucky state bikah thlipui tlehin chhiatna a thlenah hian mi 70 chuang an thi. Kentucky governor Andy Beshear chuan thlipui tleh hian hmun hrang hrangah chhiatna a thlen avangin thi zat pawh an la pun chhoh a rinawm thu a sawi. State pumah state of emergency a puang nghal bawk.

Illinois state chhim lam, Edwardsville khuaah thli tleh hian Amazon warehouse a nuai chhe bawk a, building-ah hian hnathawk mi 100 vel an awm nia hriat a ni. Mi 45 chu him takin an chhuak a, midangte chu building chimah tangin chhanchhuah hna thawh mek a ni.

Thlipui tlehin chhiatna a thlenna hmuna chhanchhuah hna thawktute pui turin National Guard-te tirh an ni bawk.

President Joe Biden chuan an ramin thli tleh a tawrh rapthlak ber zinga mi a ni tih sawiin, mi eng zatin nge nunna chan leh, eng ang takin nge thil a tih chhiat dan an la hriatchian theih loh thu a sawi. Chhiatna thlenna hmunte pawh tlawh a tum thu a sawi.