US-in China, Myanmar leh North Korea hrekna siam

United States (US) chuan China, Myanmar, North Korea leh Bangladesh-a mimal leh pawl eng emaw zat chu mihring dikna chanvo palzutah puhin a hrek a, Chinese intelligence company chu investment blacklist-ah a telh bawk.

Canada leh United Kingdom pawhin US hi zawmin, Myanmar ram chu mihring dikna chanvo palzut vangin an hrek zui ve bawk. US hian President Joe Biden hnuaiah North Korea ram hrekna a siamna hmasa ber a ni.

China chuan US sorkar thiltih hi sawiselin, China ramchhung inrelbawlnaa inrawlhah a puh. US-a China embassy thupuangtu Liu Pengyu chuan he thil hian China-US inlaichinna pawh a tichhe thei tih sawiin, sut leh nghal turin a phut.

US-in a hrek thar zingah hian Bangladesh-a Rapid Action Battalion (RAB) pawh a tel a, hei hi Bangladesh lam chuan na takin an sawisel nghal bawk. Bangladesh foreign secretary Masud Bin Momen chuan an rama US ambassador Earl Miller chu koin, an lungawi loh thu hi an thlen nghal a ni.