SKorea-in Covid-19 kaite hnu chhui nan facial recognition hmang dawn

South Korea chuan coronavirus kaite hnu chhuina atan artificial intelligence (AI) facial recognition leh closed-circuit video camera an hmang dawn tih an sawi.

Project hi nakkum January thla aṭangin Seoul khawi dai, Bucheon-ah hman ṭan a ni dawn tih official chuan a sawi.

He system hian AI algorithms leh facial recognition technology a hmang dawn a, security camera 10,820 chuang kaltlangin hri kai te chetvelna hmunte, an close contact-te leh an vahvelnaah mask an hmang ṭha em tihte chhui zui an nih tur thu Ministry of Science and ICT (Information and Communications Technology) chuan a sawi.

Bucheon official-te sawi danin he system hian mi 8,00,000 chuang chenna khawpuia tracing team-te phurrit pawh a chhawk zangkhai thei dawn a, an hnate tlin zawk leh bahlah loa an thawh theih tur thu an sawi. Bucheon Mayor Jang Deog-cheon chuan contact tracing tih a chak phah thei dawn tih a sawi a ni.

He ruahmanna siamtu, Ministry of Science and ICT chuan Covid-19 hri kaiten an thiltih leh chet velna chungchangah thu dik tawk lo an sawi fo avangin an thusawi hi a rinngam vek ṭhin lo tih sawiin, hei vang hian tracing team-ten harsatna an neih ṭhinte chhawkna tura ruahman a ni, a ti. Ram pum huap erawh chuan he project hi kalpui tumna an la neih loh thu an sawi bawk.

He system hian minute 5-10 chhungin mi 10-te chet vel dan a chhui thei dawn a ni. Buncheon hian he system hmanna tur hian Ministry of Science and ICT hnen aṭangin won maktaduai 500 (USD 4,20,000) a dawng a ni.