UK-ah Omicron vanga thihna hmasa ber thleng

Britain prime minister Boris Johnson chuan Omicron variant vangin England-ah mi pakhatin nunna a chan tih a sawi a, hei hi Omicron variant vanga thi hmasa ber a ni.

"Omicron vang hian damdawi-in a dah ngai an pun phah a, vanduaithlak takin Omicron vang hian mi pakhatin nunna a chan a ni," tiin Johnson chuan London hmarlam, Paddington-a vaccine clinic a tlawh ṭumin a sawi.

Britain health secretary Sajid Javid chuan England-ah Omicron kai damdawi-ina enkawl mi 10 an awm thu sawiin, damdawi-ina enkawl ngai leh thihpui zat chu an la pun zel theih thu a sawi. UK Health Security Agency (UKHSA) tarlan danin hri kaite hi kum 18-85 inkar an ni.

"Khawvel hian hri leng nasa tak a tuar leh dawn tih a chiang reng tawh a ni. Heng vanga damdawi-ina enkawl ngai leh thihna thleng zat tur erawh hriat theih a la ni lo. A hma aiin a thawk nep emaw, kan invenna te hian hna a thawk ṭan tawh emaw ni tein a lang. Mahse hri kai an tam chhoh dan thlir hian a ngaihṭhat thlak loh hle a ni," tiin London-a hmunpui nei intelligence leh analytics provider Airfinity-a chief executive Rasmus Bech Hansen chuan a sawi.

Britain ramah Omicron variant kai mi 1,576 an awm belh leh a,an rama Covid variant thar kai hmuhchhuah a nih aṭanga ni khata hri kai hmuhchhuah tam ber ṭum a ni. Ramchhungah Omicron kai mi 4,713 an awm tawh tih UK Health Security Agency (UKHSA) chuan Thawhṭanni khan a puang.

Britain-ah hian coronavirus kai thar mi 54,661 awm belh lehin, ramchhunga hri kai tawh zat hi mi 1,08,73,468 an tling tawh tih official-te chuan an sawi. Hri kaihhnawih vanga thi 1,46,477 awmin, Covid-19 kai damdawi-ina enkawl mek mi 7,372 an awm bawk a ni.

Thawhṭanni khan Covid vaccination center-ah mipui vaccine lak tuma intlar mi ṭhahnem tak an awm thu leh Krismas hmaa booster dose lak tuma inchuh an tam avangin National Health Service (NHS) booking site pawh a chhiat phah tih report chuan a tarlang.

Prime Minister chuan Pathianni zan khan Omicron Emergency Booster semchhuah chu an ram hmachhawp lian ber a nih thu a sawi. Health secretary chuan mipuite chu a rang thei ang bera booster dose la tura chahin, dose hnih lak chu a tawk zo lo a, dose thuma lak chuan natna tawrh tur nasa takin a tihnep phah thei tih a sawi.

Omicron kai pung chho zel karah UK-a Covid alert level chu Level 3 aṭangin level sang ber dawttu Level 4-ah tihsan a nih thu Pathianni khan chief medical officer palite thuchhuah inṭawm siam chuan a tarlang bawk.

Britain-a kum 12 chin chunglam zinga 89% chuangte chuan vaccine dose khatna an la tawh a, 81% in dose hnih an la tawh a ni. Heng zinga 41% chuangin booster dose emaw coronavirus dose thumna emaw an la tawh a ni.