Israel-in White Helmets hruai chhuak

Israel sipai te chuan Syria chhim thlang lama war zone aṭangin civil defence group, White Helmets an hruai chhuak.

Israel Defence Forces (IDF) chuan US leh Europe ramte ngenna avangin White Helmets hi an lachhuak niin an sawi. Golan Heights aṭanga an lakchhuah te hi mi 800 vel an ni.

White Helmets te hi Syria rama war zone-a mipuite chhanchhuah hna thawktu, volunteer workforce niin an insawi a ni. Ṭan lam an nei lo a, helho thuhnuaia awm bialah hian mipuite ṭanpui hna hi an thawk ṭhin a ni.

Hetih lai hian Syria President Bashar al-Assad-a thlawptu leh Syria sorkar thlawptu, Russia chuan White Helmets hian helho thlawpin, Islam firfiakte nena inzawmna an nei niin an sawi thung.

Israel sipaiten an hruaichhuah, White Helmets hi Syria sorkar laka helte thununna bial chhungah hna thawkin, sorkar sipaiten beihpui an thlak chilh avangin an tang zui a ni. Israel sipaite chuan White Helmets te hi an nunna atan a derthawn avangin an awmna hmun aṭang hian an chhungte nen hruaichhuah an nih thu an sawi. Heng mi te hi Israel ram kaltlangin, an ṭhenawm ramah hruai an ni. Israel foreign ministry thupuangtu Emmanuel Nahshon chuan White Helmets member leh an chhungte hruaichhuah an nih thu hi a sawi a, an hruaina ram erawh an puangzar lo. Mahse Jordan sorkar chuan an ram khawthlang lamah awm turin Syria civil mi 800 te a lo dawnsawn thu a sawi a, restricted area-ah awmtir an ni dawn tih a sawi a ni.

Gaza-ah beihpui thlak chhunzawm
Israel sipaite chuan Gaza Strip ramriah an sipaite kah an nih avangin Gaza-ah beihpui thlak chhunzawm lehin, Hamas ho hmunte an bei. IDF chuan ramriah beih an nih avang hian an sipai pakhat chu a hliam tuar loin a thi niin an sawi. Hetih lai hian Gaza official-te chuan Israel sipaite beihna avang hian mi pali an thi a, an zinga pathum chu Hamas firfiak pawl member an ni tih an sawi.

IDF chuan Gaza Strip hmarlama Hamas ho hmun 15 leh Khan Yunis-a hmun 25 chu indo thlawhtheihna leh tank hmanga an kah thu an sawi.