Afghanistan airport-a bomb puakah mi 14 thi

Afghanistan khawpui, Kabul airport-ah Pathianni khan bomb a puak a, mi 14 an thi a, midang 60 chuangin hliam an tuar.

Ram pawn lama tlanchhia, Afghanistan Vice President Abdul Rashid Dostum chu Pathianni khan an ramah a kir a, Kabul airport-ah hian amah thlawptu leh official eng emaw zatin an lo hmuak a ni. Gen Dostum-an airport a thlen hnu lawkah bomb hi tihpuah a ni a, Dostum-a phurtu motor erawh a tlanchhuak hman a ni.

Gen Dostum hi kum khat liamtaah khan politics lama a khingpui rubo leh pawngsual tura a mite thu peah puh a nih vangin Turkey aṭang hian a tlanchhia a, an puhna hi thu dik lo niin a sawi.

Islamic State (IS) firfiak pawl chuan Kabul airport-a bomb puak hi an pawl tih niin an sawi.

Kabul police hotu Hashmat Estankzai chuan airport-a bomb puaka thi zingah hian security force member leh traffic officer pakua an tel niin a sawi. Bomb tipuaktu hian airport gate bulah a tipuak niin a sawi.

Afghanistan President Ashraf Gahni chuan nakkum president inthlan lo awm turah Gen Dostum thlawpna a hmuh theih nan an rama kir hi a phalsak nia sawi a ni. Dostum hian lum 2001-a US-in Taliban sorkar an paihthlak theihna tur khan a pui a, mahse hemi rual hian an rama hun rei tak tualchhung indona thlenga civil mi tam tak tihhlumnaah mawhphurtuah puh a ni bawk. Gen Dostum-a thupekin mi tam tak chuan nghaisak leh mipa hmeichhiat lam hawia khawih an tawk nia sawi a ni.