China-in Sri Lanka tan dollar mtd 295 pe dawn

China President Xi Jinping chuan Sri Lanka chu ṭanpuina dollar maktaduai 295 an pe leh dawn tih a sawi.

Sri Lanka President Maithripala Sirisena chuan kar kalta Inrinni-a a bial, Polonnaruwa-a China bultuma kidney hospital sakna tur lungphum a phumnaah he thu hi a sawi a ni. Sirisena chuan, "China Ambassador-in min rawn tlawh khan China President Xi Jinping-an thilpek dang min rawn thawn thu a sawi a ni. President Xi hian ka project kalpui duh ber thawhna atan an ram pawisa, yuan tluklehdingawn hnih (dollar maktaduai 295) min pek tur thu a sawi. Chinese Ambassador hnenah hian ramchhung bial hrang hranga in min sak sak tura rawtna ka pe dawn a ni", a ti.

Sri Lanka inthlanpui neih hnuhnung berah China firm te chu president hlui Mahinda Rajapaksa campaign-na tura sum pea puh an nih avangin sawisel an tawk nasa hle. Sirisena hian president hna a chelh hnuah China thlawpnaa President hlui Rajapaksa hun laia infrastructure project siam tam zawk chu a titawp a ni. Mahse kum khat chuang hnuah, Sirisena kaihhruai sorkar hian Chinese project-te chu thawh chhunzawm a remti leh tawh a ni.