France president bodyguard hlui chenna in dap

France President Emmanuel Marcon-a bodyguard hlui, Alexandre Bennalla chu May thlaa nawrh huaihawt zinga pakhat kut a thlak lai camera-a lak fuh a nih vangin Pathianni khan investigator-ten a chenna in an dap.

Kum 26 mi, Alexandre Benalla-an mi a vuak leh kut a thlak chungchanga France sorkarin hma a lak dan tur chungchang chuan ngaihven zui a hlawh hle. Police-ten a chenna in an dap hma ni in president bodyguard hi a hna ṭang hian bantir a ni tih Paris prosecutor office chuan a tarlang.

Le Monde newspaper chuan kar hmasa-a video a tihchhuahah May Day puala nawrh huaihawt ṭuma police helmet khum chunga nawrh huaihawt zinga pakhat vawtu chu Benalla hi a nih tih hriatchhuah a ni. Hriatchhuah an nih hnuah Benalla leh a thawhpui pakhat chu thubuai siamsak an ni a, police kutah an awm mek bawk.

President Marcon-a office chuan Benalla hi nawrh huaihawtnaah hian thil awmdan thlithlai a, officer-te pui tura awm tur chauh a ni thu a sawi. Paris prosecutor office chuan kum 2017 presidential campaign laia Marcon-a security buaipuitu ber, Benalla hi ralthuam kawl phalsak a ni tawh lo a, public function-ah pawh a tel phalsak a ni lo tih a sawi.

Eptu party-te chuan Benalla chet dan hi President Macron-a beihna remchangah an hmang a, a bodyguard chetdan chu thup tumah puhin, he thil thleng chungchang hi sawifiah turin an phut.