US Congress member-ten Dalai Lama hmu turin President Biden phut

US Congress-a Democratic leh Republican member-te chuan president Joe Biden chu Tibet sakhaw hruaitu, Dalai Lama hmu tur leh, Tibet mite dikna chanvo humhalh chu an ngaih pawimawh zingah a la tel reng tih hriattir nawn leh turin an phut.

Kum 1991 aṭang khan Donald Trump tih loh US President ṭanglate chuan Tibet sakhaw hotu Dalai Lama hi hmaichhanah an la hmu ziah a ni. Mahse kum 86 mi, Dalai Lama hi a chak tawh loh avangin a zinchhuah hlei thei tawh lo a ni.

Senator 38 leh House member 27-te chuan President Biden chu Dalai Lama hmu tura an phut bakah, kum 12 liam taa China leh Dalai Lama aiawhten inbiakna an lo neih tawh chu chhunzawm tir leh tura nawr turin an phut bawk.

Dalai Lama hi a kum a lo upat leh chak tawh tawh loh avangin US a zin peih tawh loh a nih pawhin, President Biden chuan a aiawhte hmu turin vice president Kamala Harris emaw, senior official dang emaw chu India ramah tir mai turin Senator-te chuan an ti bawk. Dalai Lama hi kum 1959-a China-in a beih avanga Tibet a chhuahsan hnu khan India ramah a khawsa zui a ni.

US President hmu tur hian Dalai Lama hi a zin ṭhin a, kum Trump-a president lai khan a zin lo a, Covid-19 hri leng vanga khuahkhirhnate a nih zui avangin Joe Biden a president hnuah pawh a zin thei ta lo a ni.