SAfrica High Court-in President hlui Zuma jail-a let turin hriattir

South Africa-a Pretoria-a Gauteng High Court chuan an ram president hlui, Jacob Zuma chu jail-a let turin nimin khan a hriattir.

Kum 79 mi, Zuma hi court thupek zah loha puha thla 15 tang turin Constitutional Court chuan a hrem a,jail-a dah luh a nih hnuah September thla khan medical parole-in chhuahtir a ni. Hemi thla vek hian an hremna sut tura Zuma ngenna chu court chuan a lo hnawlsak bawk.

High court chuan Jacob Zuma hnena medical parole pek a nih dan chu dan dik lo nia sawiin, a tan hun thlak tura jail-a let leh turin a ti a ni.

Jacob Zuma hi South Africa President a nih laia eiruknaa inhnamhnawiha puhin thubuai siamsak a ni a, a thubuai ngaihtuahnaah inlan tura court-in a hriattirna chu a zawm duh loh avangin thla 15 tang tur hian hrem a ni. Court-in hremna a tihchhuah hnuah, July 7 khan Zuma hi thuneitute kutah a inpe a, amah thlawptute chuan hremna pek a nih vanga lungawi lohna lantirin ram chhungah buaina nasa tak a chhuah zui phah a ni. Buaina chhuakah hian mi 300 chuang thiin, sumdawnna hmun tam tak hal leh tihchhiatsak an ni bawk.

Zuma thlawptute chuan High Court thupek chu an pawm lo tih sawiin, jail-a Zuma dah let leh tumna chu theihtawpa dan an tum dawn tih an sawi. Court thutlukna siam danah inrawlh an awm nia sawiin, Zuma hian High Court thutlukna hi court sang zawkah khin let a tum niin an sawi.