Myanmar sipaite kuta awm laiin journalist Naing a thi

Myanmar sipaiten an man, freelance photojournalist Koe Soe Naoing chu sipaite kuta a awm laiin a thi niin a thawhpui leh a chhungten an sawi.

Koe Soe Jaing hi kar liam ta Zirtawpni khan sipai rorelna dodaltuten 'silent strike' an huaihawt lai an cover avangin sipaiten an man a, Yangon-a Eastern Botahtaung Township-a military interrogation centre-ah thawn a ni. A chanchin hriat zui a nih loh hnuah, Thawhlehni khan a chhungte hnenah Mingaladon khuaa Defence Service General Hospital-ah a thi tih hriattir an ni. Hemi ni vek hian a ruang hi Yangon-a Yay Yay Cemetery-ah halral a ni nghal bawk. A taksaah hliam a neih leh neih loh hriat chian a ni lo.

February 1-a sipaiten civil sorkar rorelna paihthla a, thuneihna an hnehchhuh avangin Myanmar ramah hian mi tam takin lungawi lohna an la lantir chhunzawm reng a ni. Sipaite hian sipai rorelna dodaltute thlawp leh, nawrh huaihawt cover ṭhin journalist pawh 100 chuang zet an man tawh bawk. Mahse an zinga a zahve vel chu an chhuah leh tawh a ni.

Journalist tam takin man tawk mah se, sipaite kuta an awm laia thi erawh an la awm lo a, Koe Soe Naing hi a hmasa ber nia hriat a ni. Hetih lai hian political activist leh Aung San Suu Kyi party, National League for Demcoracy (NLD) party member eng emaw zat chu sipaiten an hren laia thi an awm tawh thung. Sipaite kuta an awm laia thi ruang hmuh theih ṭhenkhat chu an taksaah sawisakna hnuhmate hmuh tur a awm niin human rights activist-te chuan an sawi.

Sipai sorkar chuan an ram chhunga dinhmun puanchhuahna tur dang tur hian journalist lam a hrek nasa hle a, media mi eng emaw zat a man bakah, media house te pawh tam tak a khar sak tawh bawk.

Ram pawn lama pawl hrang hrangte chuan media mi mante chu chhuah turin Myanmar sipai sorkar an phut. Thawhlehni khan Committee to Protect Journalists (CJP) chuan Democratic Voice of Burma reporter, Aung San Li chu chhuah tura an phut thu sawiin, December 11 khan sipaiten Aung San Suu Kyi-i thlawptu mi pathum in an halsak tih a report vangin man a ni, an ti. Shan state-a journalist pathum, an report pek avanga mante pawh chhuah tur leh, thubuai siamsakte pawh sut leh tura an phut thu an sawi bawk a ni.