NKorea-in ballistic missile test site a tichhe ṭan

US President Donald Trump leh North Korea hotu Kim Jong-un ten June thlaa Singapore-a summit an neih ṭuma NKorea ram hotuin a tiam angin ballistic missile test site chu an tichhe ṭan nia sawi a ni.

Washington-based think tank, 38 North-in satellite image a tihchhuahah, NKorea-in ballistic missile engine siamna atana a hman bawk, Sohae Satellite Launching Station-a space-launch vehicle leh a bula rocket engine test stand-te chu ṭhiah mek an ni.

28 North chuan heng hmunte hi NKorea-in intercontinental ballistic program a kalpuinaa pawimawh tak an ni tih sawiin, NKorea-in ṭhiah hna a thawh ṭan hi an thu lo intiam tawh tihpuitling tura rinngam a nih zia a lantir tumna niin a sawi.

June 12-a Singapore-a summit an neih hnuah news conference a neihnaah, US President Donald Trump chuan NKorea ram hotu hian an rama missile engine testna hmun pui ber chu an tihchhiat thuai tur thu a tiam niin a sawi a ni. Trump hian a hmun tak erawh a sawilang lo a, mahse a hnuah official-te chuan Sohae hmun ami niin an sawi.

US official-te chuan NKorea hian a nuclear weapon proramme a tihtawp tur thu an sawi fo a, mashe NKorea lam hian eng anga kalpui nge a tum dan erawh a sawichiang lo a ni. Kar kalta Zirtawpni khan US senior official-te chuan Kim chu a lo intiam tawh anga nuclear ralthuam tichhe tura hma la ṭan turin an phut a, a thutiam hi a tih hhlawtlin loh chuan US bakah ram dangten NKorea ram an hrekna chu chhunzawm zel a nih tur thu an sawi a ni.