Nawas Sharif-an damdawi-ina dah duh lo

Pakistan-a Rawalpindi-a Adiala jail-a tang mek, prime minister hlui Nawaz Sharif-a chu a kal a ṭha lo a, damdawi-inah enkawl vat a ngai niin doctor board-in sawi mah se, Sharif-a hian damdawi-ina sawn a duh lo a, jail chhunga enkawl a duh zawk nia sawi a ni.

Jail chhunga Sharif-a hriselna dinhmun endiktu, medical board chuan a kal hi a ṭhat loh vangin a rang thei anga bera damdawi-ina sawn turin an ti a, a tanna jail chhunga medical centre-ah chuan damlo tana IV fluid pekna tur hmanruate an nei ṭha tawk lo niin an sawi. Sharif-a endiktu team-ah hian doctor pali an awm a ni.

Doctor-te chuan jail chhunga boruak lum lutuk leh dehydration vangin Sharif-a hian a ṭhat loh phah a, a mut ṭhat loh vang leh a natna te enkawl mai anih loh vangin a zual chak niin an sawi.

Kum 68 mi, Sharif-a hi a hma pawhin lung ṭha lo, hypertension leh diabetes vangin enkawl a lo ngai fo tawh a, kum 2016 kha London-ah a lung zai a lo ni tawh bawk.

Sharif-a chuan damdawi-ina insawn a duh loh thu sawiin, amah enkawlna tur hmanruate chu jail chhunga medical centre-ah chuan dah zawk turin a ti.