Greece-a ram kangah mi 20 thi

Greece ram hmun hrang hranga khaw lum lutuk vanga ramngaw kangah mi 20 an thi tawh a, mi dang tam takin hliam an tuar .

Greece khawpui, Athens bula ram kang vangin mi tam takin an chenna in an chhuahsan tawh bawk. Official-te chuan ram kang vanga lawng hmanga tlanchhia, khualzin 10-te chu an awmna hriat theih a la ni lo a, zawn mek an nih thu an sawi.

Prime Minister Alexis Tsipras chuan ram kang ṭhelh mit tur hian theihtawp an chhuah zel tur thu a sawi. PM hian ram kangin an rama harsatna a thlen mek avang hian Bosnia ram a tlawh tur pawh a ṭhulh phah a ni. Hetih lai hian kangṭhelhtute chuan ram kang ṭhelh hna hi a hautakin a harsa hle niin an sawi.

Sorkar thupuangtu Dimitris Tzanakopoulos chuan ram kanga vanga thi mi 20 an tling tawh tih sawiin, an zinga tam zawk chu Athens hmarchhak lam, Mati seaside resort-a ram kang vanga tangkhangte an nih tih sawiin, an in leh car chhungahte thia hmuh an ni tih a sawi. Hliam tuar mi 104 chuang an awm a, an zingah mi 11 te chu an dinhmun a ṭha lo hle niin a sawi bawk.

Greece sorkar chuan an rama ram kang ṭhelhna turah Europe ram dangte puihna a dil a, helicopter leh kangṭhelhtute thawn turin a ngen. Italy, Germany, Poland leh France chuan puitu tur hi an tir tawh a ni.