England CMO-in Krismas lawmna titlem turin mipuite ngen

England-a chief medical officer (CMO), Chris Whitty chuan hripui len hnua Britain rama coronavirus kai hmuhchhuah tam ni ber a thlen hnuah, an ram mipuite chu Krismas laia pawn chhuak tam lo turin a ngen.

Hri thar inkaichhawn awlsam tak Omicron variant chu Britain-ah a darh mek avangin Nilaini khan Covid-19 kai thar mi 78,610 an awm belh leh a,kumin January thlaa hri kai tam ni ber aiin mi 10,000 velin hri kai thar hi an tam zawk a ni.

Chief medical officer Chris Whitty chuan Britain chu hri chi hnihin a len chilh mek thu sawiin, mipuite chu Krismas lawmna tura an thil ruahman tawhte pawh sut leh turin a ngen. "Mipuite chuan midang nena awmho loh chu an ngaih pawimawh hmasak ber a ngai a ni," a ti.

Whitty chuan kar rei lote hnuah hri kai punna chuan record a siam chhoh zel a rin thu leh, mi ṭhahnem tak damdawi-in panpui ngai awm chu an ram hmabak a ni dawn niin a sawi.

Prime Minister Boris Johnson chuan an ram mipuite chu a hmaa fimkhur zual turin a chah tawh bawk a, mahse tun maiah erawh sorkar chuan inkharkhip kalpui tumna a nei lo tih a sawi.

"Punkhawmna buatsaihte kan ṭhulh lo a, mikhual luh khapna kan siam dawn lo a, mipuite intih hlimna emaw midang nena inhmuhkhawmna ṭhulh turin kan ti dawn rih lo a ni, a ti.

United Kingdom-ah mi maktaduai 67 vel chengin, an zinga maktaduai 11 chuangin hri an kai tawh a ni. Nitina hri kai hmuh chhuahin record thar siam zel mah se hripui len tirh nena khaikhin chuan thihpui zat hi an tlahniam tawh a ni. Sorkar chuan hri kaite pawn an lak nat lutuk lohna atan booster semchhuah hna rang taka kalpui an tum a ni.