Kum 18 chung lamte'n booster atan J&J dose la thei dawn

European Union drugs regulator chuan Nilaini khan puitling kum 18 chin chunglamte chuan dose khata lak chi, Johnson & Johnson Covid-19 vaccine an lak aṭanga thla hnih ral hnuah booster dose angin an la leh thei dawn tih a sawi.

European Medicines Agency chuan J&J vaccine hi Pfizer leh Moderna siam vaccine dose hniha la tawh te pawhin booster dose atan an hmang thei dawn a ni, a ti bawk.

Agency chuan EU ram 27-a public health body te chuan official-in booster hman phalna an pechhuak maithei tih sawiin, tualchhunga hri leng dinhmun thlir chung leh vaccine kan neih dan, a hnathawh dan leh booster dose-in min ven theih dan thlirin booster dose hman phalna hi an tihchhuah mai a rinawm thu a sawi.

U.S. Food and Drug Administration chuan October thla khan J&J leh vaccine dang la tawhte tan Johnson & Johnson booster dose hman phalna hi a tichhuak a ni.

Johnson & Johnson chuan US mipui zingah an vaccine dose khatna an lak aṭanga thla hnih hnu leka dose hnihna an lak lehin, Covid-19 natna langchhuak thei tur chu 94%- 70% thlengin a veng thei niin an hmain an lo sawi tawh.

European Commission president Ursula von der Leyen chuan nakkum January thla laihawl velah chuan EU ram 27-ah omicron chu coronavirus variant darh nasa ber a nih a rinawm tih a sawi. Hri kai an pun chhoh leh nasat avangin hunpui laiin Europe chu dinhmun ṭha lo takah a ding ang tih hlauhthawnna a lian a hle.

EU executive branch hotu erawh chuan omicron laka inveng turin bloc-te chu an inpeih tawh thu leh Europe mipui zinga 66% te chuan vaccine dose kimin an la tawh tih a sawi. Von der Leyen chuan EU ramte chuan hri leng do hneh thei tura chakna leh theihna a nei a ni tih sawiin, Covid-19 vanga hunpui lawmna an nei leh thei dawn lo chu pawi a tih thu a sawi. "Hri lengin Krismas a hliahkhuh leh tur hi nangni ang bawka min ti lungngai tu a ni," a ti.