Winter Olympics-ah Russia President Putin a kal dawn

Khawvel ram eng emaw zat hruaituten Beijing-a 2022 Winter Olympics neih tur diplomatic boycott a, ram aiawha sorkar official tirh an tum tih an sawi hnuah Russia president Vladimir Putin chuan amah ngei a kal dawn tih China president Xi Jinping nena an inbiaknaah a sawi.

Vladimir Putin hi ram lian hruaitu zingah Winter Olympics-a an tel tur thu sawichhuaktu hmasa ber a ni. President Xi nena an inbiak hnuaa thu sawiah, "International sports lama thawhdunna kawngah kan inthlawp tlat a ni tih ka sawi duh a, sports leh Olympic Movement hi politics nena kaihhnawih tir kan duh lo a ni," a ti.

US leh ram dang eng emaw zat chuan China chu mihring dikna chanvo a palzut nasat avangin an lungawi lohna lantir nan, Winter Olympics an neih turah hian an ram infiammite tirh ni mah se, ram aiawhin official erawh tirh an tum lo tih an lo sawi tawh a ni. Mahse an puhna hi China chuan a pha thung.

February thlaa Winter Olympics neih tura high-level official tirh an tum loh thu tichiang tawh zingah hian US, UK, Australia leh Canada an tel a, nimin khan Japan prime minister Fumio Kishida pawhin Games-ah hian tel a tum lo tih a sawi leh bawk.