Philippines-ah typhoon Rai a tleh

Philippines chhim lama ruah pai thlipui na tak, typhoon Rai tleh vangin nimin khan mi sang tel chu hmun him lamah sawnchhuah an ni.

Typhoon Rai hi kumina Philippine rama thlipui tleh 15-na niin, kumina khawvela thli tleh zinga a na ber zinga mi nia sawi a ni. Nimin khan chhim lam, Surigao del Norte province-a Siargao island chu darkar khata 195-a naa tlehin a nuai tih Philippine weather bureau chuan a sawi.

Thlipui tleh leh ruahsur nasa vangin airline-te chuan flight tam tak an ṭhulh a, transport lam hotute chuan Philippine ram laili leh chhim lamah tuipui leh khawmuala zin chhuah an khap bawk. Hei vang hian lawng chawlh hmunah mi tam tak an tangkhang mek a ni.

National disaster mitigation agency chuan an rama region pariat chu thlipui tleh vang hian inralring tura hriattir an nih thu sawiin, heng region pariat-ah hian mi maktaduai 30 chuang an cheng a ni. Mi tam tak chu thlipui thlen hma hian insawnchhuak tura hriattir lawk an ni bawk.

Philippine ram hi kumtinin thlipuiin ṭum eng emaw zat a nuai ṭhin. October thla khan typhoon Kompasy tleh vangin an ram hmar leh khawthlang lamah mi 11 an thi a ni.