Laos-a dam chimah mi 20 thi

Laos rama e Xe-Pian Xe-Namnoy hydroelectric power project atana tui khuah chu Thawhlehni tlai khan a chim a, a bul vela thingtlang khaw eng emaw zat chu tuilianin hian chimin mi 20 an ti.

Dam chim vanga tui lian hian chenna in tam tak a tichhia a, chin hriat lohin mi 100 vel an la awm mek bawk.

Attapeu province thuneitute chaun tui lian tuarte chhanchhuah hna thawh nan hian helicopter leh lawng te an hmang a ni. Tuilianin khua a chima chengte hi himna zawngin in chung lamah te an tlanchhia a ni. Tualchhung thuneitute chuan harsatna tawkte chhawmdawlna tur–thuamhnaw, ei tur, tui thianghlim leh damdawi te pe turin sorkar leh pawl hrang hrangten an ngen.

Thawhlehni tlai dam chim hi 'Saddle Dam D' tih a ni a, Xe-Pian Xe-Namnoy hydroelectric power project atana dam lian pahnih leh subsidiary dam panga siam zinga mi a ni. He dam hi zawhfel a la ni lo deuh a, 90% vel hna hi thawh zawh ni tawhin nakkum aṭanga hman theih tura ruahman a ni.

Project thawktu, South Korea company SK Engineering & Construction chuan Pathianni khan dam siam meka khi awm chu an hmuchhuak a ni. Hei vang hian dam awmna bul thingtlang khuaa chengte chu hruaichhuah ṭan nghal an ni. Company hian dam chhe lai siam tur team pawh a tir a, mahse ruahsur nasain kawng tam tak a tihchhiat vangin hna an thawk mumal thei lo a ni.

Thawhṭanni chawhma lam khan state sorkar chuan dam hi a chhiat belh zel a hlauhthawnawm thu sawiin, a hnuai lam khuaa chengte chu insawnchhuak turin a ti a, hemi zan hian dam chhiatna lai hi a zual zel tih finfiah a ni bawk.

Thawhlehni chawhnu lam kha subsidiary dam chu a chim a, zanah chuan a bul vela thingtlang khaw pasarih chu tuilian hian a chim a ni.