US-in loneitute khaichhuah nan dollar tld 12 pe dawn

US President Donald Trump-a kaihhruai sorkar chuan ramdangte chhiah tihsan tuartu loneitute harsatna laka khaichhuahna turin US dollar tluklehdingawn 12 a pe dawn.

President Trump-an ram dang aṭanga an bungrua lakluhah chhiah a tihsan chhanlet nan ram dang eng emaw zat chuan US thilsiam an lakluhah chhiah an tisang ve a ni. Hei vang hian loneitute tan harsatna a thlen avangin US sorkar chuan agriculture industry ṭanpuina tur hi a ruahman ta a ni.

Sorkar chuan loneitute tan man tlawm zawka thil an lei theihna tur leh, an thlai hralh theih lohte leisakna tur ruahmanna hi a siam ta a ni. Sorkar chuan thlai leh nuts te leiin hengte hi food bank leh sorkar hnuaia nutrition programme atan pek a tum a ni.

Thawhlehnia thu a sawi-ah, President Trump chuan ram dangte nena insumdawn tawnna kawnga inremna thar siam hunah loneitute chu a chhawrtu ber an nih tur thu asawi. Mahse agriculture industry chuan President-in hmalakna hian an thlil siamchhuah demand-na kawngah leh a leitute nena an inkar boruak a tichhe thui hle niin an sawi. Chhiah lak tihpun a nih hnuah soyabean an hralhchhuah zat chu 15% chuangin a tlahniam niin an sawi.

US Agriculture Depart-ment chuan sumdawnna lama ram dangte nena harsatna an neih vang hian dollar tluklehdingawn 11 vel an hloh dawn niin an sawi a ni.