Myanmar-a inbeihna thleng vangin Thailand-ah mi tam tak tlanchhia

Myanmar sipaite leh helpawlte inbeihna thleng vangin mipui ṭhahnem tak chu an sahimna zawngin Thailand ramah an tlanchhia tih Thailand rama thuneitute leh chhawmdawl hna thawktu pawlte chuan an sawi.

Thailand border province, Tak chuan an thuchhuahah, Nilainia Karen National Union (KNU) helpawl leh Myanmar sipaite inkara indona chhuak vang hian mi 700 bawr vel chu Thailand-a khaw pakhat, Mae Sot lamah an tlanchhia tih a sawi a ni.

Thailand-a hmunpui nei, Myanmar migrants group Aid Alliance Committee-a official Ye Min chuan Thailand ramah hian Myanmar mi tlanchhia mi 2,503 awm tawhin, an zinga 545 te chu naupang an nih thu a sawi. Thailand thuneitute nena thawkhoin, heng mite ei tur hi an pe ṭhin niin a sawi bawk. Raltlan tam zawkte hi Lay Kay Kaw leh khaw dang mite an nih thu Ye Min chuan a sawi.

February 1-a Aung San Suu Kyi kaihhruai sorkar paihthlaa sipaiten thuneihna an hnehchhuh hnu khan Myanmar hian buaina hrang hrang a tawk chho reng a, khawpuiah lungawi lohna te lantirin, thingtlang lamah pawh tualchhung mite leh sipaite inbeihna hi a khat tawkin a thleng fo a ni.

Myanmar ram inrina bulah hian sipai leh KNU pawlte inkarah pawh indona hi chhuak foin, KNU hi Myanmar rama helpawl upa ber a ni. KNU chuan Nilainia sipaite nena an inbeihnaha hian sipai pali an thi a, midang paliin hliam an tuar bawk niin an sawi.