Israel-in Africa ramte tan Covid-19 vaccine dose mtd 1 pe dawn

Israel sorkar chuan Nilaini khan United Nations hnuaia Covax programme kaltlangin Africa ramte tan coronavirus vaccine maktaduai khat a pe dawn tih a sawi.

Israel Foreign Ministry chuan tun aṭanga kar rei lote chhungin AstraZeneca vaccine hi thawnchhuah theih an inbeisei thu a sawi a, "Israel-in khawvel huapa hripui leng mek tireh tura hma kan la ve thei tur hi kan lawm hle a ni," tiin Foreign Minister Yair Lapid chuan a sawi.

Vaccine an pek tur hi Africa ram hmun lia ṭhena hmun khat vel hnenah pek an ni dawn a, a dawngtu tur ram erawh tarlan an ni lo thung.

Israel hian Africa ram ṭhahnem takte nen inkungkaihna ṭha tak an nei tawh a, heng zingah hian Kenya, Uganda leh Rwanda-te pawh an tel a ni. Nikum khan Sudan nen thawhdunna tur pawh an siam leh a ni.

Covax hi khawvel huapa ram rethei zawkte hnena coronavirus vaccine pekna tura hmalatu niin, he program kaltlang hian ram tam takah vaccine hi pek chhuah a ni tawh.

Hetih lai hian Covid vaccine siamchhuah zinga a tam zawk hi ram hausaten an chang a, hei vang hian khawvel ram hrang hranga vaccine semchhuah dan pawh a rualkhai thei lo a ni. Israel hi an ram mipuite tana vaccine semchhuak hmasa ber zinga mi a ni a, mahse Palestinian-te hnenah vaccine an pekchhuah tam loh avangin sawisel a lo tawk fo thung. Hemi hnu hian Israel rama Palestinian mi hnathawka awm tam zawk chu vaccine hi a pe ve leh a ni.