NKorea-in Kim Jong-il sunna neih chhungin nuih leh zu in khap

North Korea sorkar chuan an ram hruaitu hlui, Kim Jong-il thih cham vawi 10-na, nimin aṭang khan ni 10 chhung sunna hun a hmang dawn a, hemi chhung hian mipuite chu nuih rik, bazar leh zu in a khap.

Kim Jong-il hi kum 1994-2011 chhung khan NKorea ram hotu niin, a fapa naupang ber Kim Jong-un-a'n a thlak a ni.

Radio Free Asia chuan Kim Jong-il sunna hun hman chhung hian an ram mipuite chu nuih leh zu in khapsak an nih bakah, intihhlimnna hunte hman phalsak an ni lo bawk niin a sawi. A thih cham tak, nimin bikah khan ei tur lam chi lei pawh an khap bawk a ni. Hemi hun chhunga chhungte thi awm pawh a ria ṭah chhuah khap a ni tih RFA chuan a sawi. Heng khapna siamte hi bawhchhia an awm a nih chuan hremna na tak pek an ni dawn niin border city, Sinuiju khuaa cheng pakhat chuan Radia Free Asia a hrilh.

Kim Jong-il sunna hun hman chhung hian sorkar chuan a pualin thil hrang hrang buatsaih a tum a, heng zingah hian vantlang hmuh tura a thlalak tarchhuah te, a hming chawia pangpar hming an phuah 'Kimjongilia' pholanna hunte an buatsaih ang.