Pakistan inthlanah Imran Khan-a party-in hma a hruai Result puan hun tikhawtlai

Pakistan ram inthlanpui chu Nilaini khan neih a ni a, zan dar 6 thleng vote thlak niin vote thlak hun khar a nih hnuah vote tlate chhiar zui nghal a ni.

Vote chhiar mekah cricketer hlui, Imran Khan-a party Pakistan Tehreek-e-Insaf (PTI) chuan hma a hruai mek a, mahse Prime Minister hlui Nawaz Sharif-a party Pakistan Muslim League-Nawaz (PML-N) chuan vote tihchingpen a awm nia sawiin, result hi an pawm lo tih an sawi. Hei vang hian result kimchang tihchhuah hun pawh tihkhawtlai rih a ni. Election official-te chuan complaint hrang hrangte chu an enfiah tur thu an sawi.

Inthlan hi Parliament lower house, National Assembly-a seat 342-a general seat 272 atan leh, provincial assembly pali-a general seat 570 atan neih a ni. Mahse National Assembly seat pahnihah chuan candidate thih vang leh, harsatna dang a awm vangin vote thlak a ni lo a, seat 270-ah inthlan hi buatsaih a ni.

National Assembly-a general seat 270 atan hian candidate 3,428 an awm a, provincial assembly-a seat 570-ah candidate 8,245 an awm bawk. National Assembly-ah hian seat 342 a awm a, heng zinga member 272 chu mipuite

thlan a ni a, seat 60 chu hmeichhe tan leh seat 10 chu sakhaw tlem zawkte tan hauhsak an ni. Seat hauhte hi House-a member an neih ngah dan azirin political party-te hnenah pek an ni ṭhin. Sorkar siam tur chuan House-ah hian seat 172 chin neih phak a ngai.

Election Commission of Pakistan-in vote chhiar tawh china result a tihchhuahah PTI hian seat 113-ah hma a hruai mek a, PML-N chuan bial 66-ah hma a hruai bawk. Prime Minister hlui Benazir Bhutto-i fapa, Bilawal Bhutto Zardari-a kaihhruai Pakistan Peoples Party (PPP) chuan bial 39-ah hma a hruai mek bawk. Election Commission official chuan final result tihchhuah hun chu tihkhawtlai a nih thu a sawi.

Inthlan ni hian venhim hna thawk turin sipai 3,70,000 duty tir an ni a, heng mite hi police 450,000 ten an pui bawk. Venhim hna thawk tura dahte hi kum 2013 inthlanpui aiin a let nga zetin an tam a ni. Hetichung hian ram chhung hmun hrang hrangah pawikhawihna leh tharum thawhna thleng vangin mi 34 an thi a, midang 30 velin hliam an tuar. Balochistan province-ah police van chu thihchilh bomb hmanga beih niin mi 31 an thi a, an zingah hian police panga leh naupang pahnih an tel. Khyber-Pakhtunkhwa-a Swabi district-ah party pahnih member-te intibuaiin PTI worker pakhat a thi a, midang pahnihin hliam an tuar. Mirpurkhas polling station pawn lama inkahna thlengah mi pakhat a thi bawk.