Syria-a thihchilh bomb puakah mi 221 an thi

Syria chhim lamah Nilaini khan thihchilh bomb ṭum eng emaw zat puakin mi 221 an thi. Islamic State (IS) firfiak pawl chuan bomb hi an tihpuah niin an sawi.

Syrian Observatory for Human Rights chuan sorkar kuta awm, chhim lama Sweida province-a hmun hrang hrangah bomb hi tihpuah a nih thu an sawi. Bomb puaka thi mi 221 zinga mi 127 chu civil mi an ni a, a dang chu sorkar thlawptu fighter te an ni.

IS firfiak pawl chuan pawikhawihna rapthlak tak hi an pawl tih nia sawiin, an pawl sipaite chuan Sweida khawpuia Syria sorkar hmun pawimawh leh security outpost te an kap a, a hnuah bomb an tipuak zui niin an sawi. Sweida khawpui hi thihchilh bomb paitu mi pali in an beih thu leh, Sweida hmar leh khawchhak lama thingtlang khaw hrang hrang pawh firfiakte hian an inah kal chilhin an kap bawk niin a sawi.

Sweida province-a cheng tam zawk hi Druze minority an ni a, Syria sipai leh IS firfiakte inbeih hnuah Sweida rama thisen chhuahna a thlen nasat ber a ni.