Japan-in Aum Shinrikyo member paruk tihlum

Japan sorkar chuan kum 1995-a Sarin gas hmanga Tokyo subway beihnaa thi tura thiam loh a lo chantir tawh, Aum Shinrikyo pawl member parukte chu nimin khan a tihlum.

Tokyo beihnaa thi tura thiam loh chantir, Aum Shinrikyo pawl hotu Shoko Asahara leh midang paruk chu tun thla tir khan tihhlum an lo ni tawh bawk a ni.

Sarin gas hmanga Tokyo subway beihnaah hian mi 13 an thi a, mi sang chuangin hliam an tuar bawk. Aum Shinrikyo hi tualthahna thleng eng emaw zatah puh an ni bawk a, hei bakah hian kum 1994-a mi pariat thihphahna leh midang 600 in hliam an tuar phahna, Sarin gas hmanga pawikhawihna thlengah pawh mawhphurtua puh an ni bawk.

Nimina tihhlum zingah hian Aum Shinrikyo recruiter pawh a tel a ni.

Kum 1995, March 20 khan Japan khawpui Tokyo subway-ah Aum Shinrikyo member-te chuan Sarin gas hi an tichhuak a, he tur hlauhawm tak tihchhuah tuartute chu second reilote hnuah thawk lamah harsatna neiin an luak bawk a, ṭhenkhat chu an mit a del phah bakah taksa che thei loten an awm a ni. Aum Shinrikyo hi sakhaw kalfawr pawl niin, an rin danah chuan khawvel a tawp dawn hnai a, an pawl member ni lote chu an thah phawt loh chuan hremhmumah an kal dawn niin an ngai a ni. Kum 1995-a pawikhawihna an thlen hnu hian an pawl hi an biru zui a, hemi hnu hian Aleph leh Hikari no Wa tih hmingin an awm zui a ni. Aum Shinrikyo hi US leh ram dang eng emaw zat chuan firiak pawlah an puang a, mahse Jpaan ramah chuan Aleph leh Hikari no Wa ti ang hian an awm phalsak a ni thung.