Netherlands-in inkharkhipna kalpui ṭan
Netherlands chuan an rama Covid-19 Omicron variant darh zel avangin nimin, Pathianni aṭang khan ram pumah inkharkhip kalpui leh ṭan a nih thu prime minister Mark Rutte chuan a sawi.
PM Rutte chuan nimin aṭanga hman turin kar liamta Inrinni khan nitin mamawh dawr tiam loh zawngte bakah restaurant, bar, cinema, museum leh theatre-te chu January 14, 2022 thleng khar lailawk tur leh school-te pawh January 9 thleng khar turin thupek an tichhuak a ni.
Heng thupekte hian nitin mamawh lamkhawmna dawr, supermarket leh pharmacy-te erawh a huam tel lo thung.
Inleng neih theih zat pawh mi pali aṭangin mi pahnihah tihtlem a ni a, mahse hei hian Krismas ni bik erawh a huam tel lo ang. Pawn lama awmkhawm thei zat pawh mi pahnih chinah tihtlem a ni bawk.
Rutte chuan inkharkhipna kalpui leh a ngaih thu hi sawiin, "Hei hi kan pumpelh theih miah loh tur hri leng thawh ngana leh kan hlauhthawn aia Omicron chak taka a darh vang a ni. Kan invenlawkna atan kan chetchhuah vat a ngai a ni," a ti.
PM chuan bar, restaurant leh vantlang punkhawmna hmun ṭhenkhat, cinema leh theatre-te tlai dar nga hnulama inkhar vek tura thupek an siam tawh bawhzuina a nih thu sawiin, hri darh zel tur venga an chetchhuah vat loh chuan damdawi-ina Covid-19 kai damlo enkawlna hran siam mek te chungah harsatna lian zawk a thlen a hluahthawnawm thu a sawi.
Dutch outbreak management team-a an hotu, Jaap van Dissel chuan kumin kumtawp lamah chuan Omicron variant hian Delta strain chu luahlanin Netherlands rama hri leng nasa ber a nih tur thu a sawi.
World Health Organization (WHO) chuan kar liam ta Inrinni khan Delta variant aiin Omicron variant chu a darh chak zawk hle tih a sawi a, ni 1.5 - ni thum inkarah a let hnihin hri inkaichhawng hi an pung niin a sawi. Variant inthlak danglam hi hri laka invenna nei tawhte tamna ramah pawh chak takin a darh mek a ni.
Ram 89-ah Omicron hmuchhuak tawh : WHO
Coronavirus omicron variant chu ram 89-ah hmuhchhuah a ni tawh tih World Health Organization chuan kar liamta Inrinni khan a puang.
UN health agency chuan Delta variant aia Omicron hi a darh chak zawk avangin tualchhunga hri inkaichhawnna tam zawk chu Omicron hian a rawn thlak dawn tih an sawi.
WHO chuan vaccine la tamna ramah emaw mi nawlpuiin Covid-19 an dampui tawhna ramah emaw pawh he variant hi chak takin a darh mek tih an sawi bawk.
Covid variant thar a darh hnu hian vaccine ṭhat tawk leh tawk loh chungchangah zawhna tam tak a awm mek a, mahse eng ang takin nge Covid-19 vaccine hman mekte hian Omicron laka hna an thawh dan leh, he variant hian mihringah natna a thlen theih dan data mumal tak an la neih theih loh thu health agency chuan a sawi a ni.
WHO chuan November 26 khan Omicron hi variant of concern-ah a puang a ni.