Malaysia rama tuilian vangin mi 21,000 chuang sawn chhuak

Malaysia rama ruahsur nasain tuilian a thlen avangin mi 21,000 chuang chu an chenna in aṭangin sawnchhuah an ni tih nimin khan state news agency, Bernama chuan a sawi.

Perak chu tuilian tuar nasa ber state niin, state dang parukah tui hi a lian a ni.

Prime minister Ismail Sabri Yaakob chuan Malaysia mipui tamna bial, Selangor aṭangin tuilian tuar mi 15,000 te chu sawnchhuah an ni a, relief center 100 chuang siamah an awm mek tih a sawi. Inrinni liam ta ruahsur chu ṭum danga thla khat chhunga ruahsur zat zet a nih thu a sawi bawk.

Tuilian vang hian mi tam tak chu an motor leh hmun dangahte an la tang a, heng mite chhanchhuah hna hi ngawrh taka thawh mek zel a ni tih PM chuan a sawi. Chhanchhuah hna hi police, army leh fire depatment aṭangin mi 66,000 chuangin an thawk mek a ni.

PM chuan tuilianin thil a tihchhiatte hrang hrang, chenna in leh infrastructure dangte siamṭhatna atan sorkar chuan ringgit maktaduai 100 ( USD mtd 23.71) a ruahman tih sawiin, chenna in chante pawh sum lama chhawmdawlna pek an ni dawn tih a sawi.