Iran-in a beihnaah American thi awm lo US-in Iran nena inbiakna neih a inpeih
United States (US) president Donald Trump chuan Nilaini zana White House-a thu a sawiah, Thawhlehnia Iran-in missile hmanga Iraq-a US sipaite a beihnaah an sipaite zingah thi leh hliam an awm lo tih a sawi. Hemi rual hian US chuan Iran hrekna a siam belh nghal thu a sawi.
Donald Trump chuan Iran pawh a inbengdai ṭan nia a lan thu sawiin, hei hi a eng lam lam tan pawh thil ṭha a nih thu a sawi. Mahse Iran chu economy lama hrekna na tak siam belh a nih thu leh, hei hi Iran-in a awmdan phung a thlak danglam hma chu hman chhunzawm a ni dawn a ni, a ti.
US President chuan an ram sipaite chak zia a sawi lang a, mahse hemi avang hian sipai chakna chu hman kher an tum lo tih a sawi. NATO chu Middle East chungchangah tun aia inrawlh nasa zawk tura a ngen tur thu a sawi.
US leh Iran thawhdun theihna chungchangte sawilangin, "Iran-a Islamic State (IS) firfiakte tihchhiat chu an tan pawh thil ṭha tak a ni a, hemi kawngah hian kan thawhdun pawh a ngai a ni," tiin Doland Trump chuan a sawi. Pentagon chuan Iran hian Thawhlehni khan missile 16 vel hmangin Iraq-a US leh ṭangrual sipaite awmna, military base pahnih a beih thu a sawichiang tawh a, Iran-a Islamic Revolution Guard Corps (IRGC) chuan missile hmanga beitu an nih thu pawh an sawi tawh bawk.
Missile kahchhuah zinga 11 hian Al Asad air base a fuh a, pakhatin Irbil base a fuh bawk. IRGC chuan he thil hi US sipaiten Iran General Qassem Soleimani an thahsak avanga an chhan letna a ni tih an sawi a ni.
Iran nena inbiakna neih inpeih
US chuan Iran nena inbiakna neih a inpeih reng thu United Nations hnena lehkha a thawnah a sawi. Hemirual hian General Soleimani an thah chhan chu an ram venna atana ti an nih thu a sawi nghal bawk. US chuan General Soleimani hi firfiakah a ngai a, America sipai tam tak thihna leh beihnaah mawhphurtuah a ngai a ni.
UN Security Council hnena lehkha a thawnah, UN-a US ambassador Kelly Craft chuan US chuan khawvel pum huap pawha boruak chhe zawk thleng zel tur venna atan Iran nena uluk taka inbiakna nei turin US chu a inpeih tih a sawi.
Hetihlai hian Iran UN ambassador Majid Takht Ravanchi chuan US-in economy lama hrekna na tak a siamsak reng chungin inbiakna neih duh anga a insawi chu thil awihawm lo tak a ni, a ti ve thung.