Pakistan-ah Imran Khan-a party in seat la hnem ber

Pakistan ram inthlanpui neih zawh takah cricketer hlui, Imran Khan-a party Pakistan Tehreek-e-Insaf (PTI) chu party mala seat la hnem ber a ni. Imran Khan chu Pakistan prime minister thar a ni thei dawn ta a ni.

Election Commission of Pakistan-in nimin zinga inthlan result a tihchhuaahah, Parliament lower house, National Assembly-a seat 270 a inthlan neihah PTI hian seat 110 a la a ni. Seat la hnem ber ni mah se sorkar siam turin member 137 neih phak a ngaih avangin PTI hian party dang a thawhpui a ngai dawn a ni. Jail-a tang mek Prime Minister hlui Nawaz Sharif-a party Pakistan Muslim League-Nawaz (PML-N) chuan seat 63 a la a, Pakistan Peoples Party (PPP) chu pathumna niin seat 42 a la bawk.

PTI hotu Imran Khan chu Islamabad 2 bialah vote 92,891 in a chak a, prime minister hlui leh PML-N hotu Sahid Khaqan Abbasi a hneh a ni. Imran Khan hi seat panga-ah dingin a chak vek a ni.

National Assembly seat 272-ah inthlan neih tura tih ni mah se, seat pahnihah chuan candidate thih vang leh harsatna dang awm vangin vote thlak a ni lo.

Pakistan cricket team captain hlui Imran Khan chuan an party-in hnehna an chan avanga mipuite hnenah lawmthu sawiin, kum 22 kaltaa Pakistan tana a thutlung lo kalpui ṭan chu a taka tipuitling turin Pathian in hun ṭha a pe ta niin a sawi. PTI kaihhruai sorkar hnuaiah Pakistan chuan bung thar a kai dawn tih sawiin, rorelna dik leh langtlang a ni dawn a, foreign policy-te a ngai pawimawh dawn tih a sawi.