Pastor Andrew Brunson vangin Turkey hrekah vau

US President Donald Trump leh Vice President Mike Pence-te chuan Turkey ram chu Turkey ram jail-a tang mek, Kristian pastor Andrew Brunson chu chhuah zalen a nih loh chuan Turkey ram hrekah an vau.

North Carolina mi, pastor Andrew Brunson chu Turkey rama dan pawna hnawla political group nen inzawmna neia puhin man a ni a, kum hnih dawn tantir a ni tawh a ni.

President Trump chuan pastor hi chhuah nghal tura phutin, chhuah a nih loh chuan Turkey chuan hrekna lian tham tak a hmachhawn a ngai dawn tih a sawi. Mahse Turkey foreign ministry chuan US thil phut hi an pawm nghal mai theih loh thu a sawi a, ministry thupuangtu Hami Aksoy chuan, "Tumahin Turkey ram hi thu pein min vau tur a ni lo", a ti.

Pastor Andrew Brunson hi Turkey ramah hian hun rei tak a cheng tawh a, nupui leh a fa pathumte awmin, Protestant kohhran Izmir Resurrection Church-ah pastor a ni. Kum 2016-a Turkey sorkar paithlak tuma beitua puh, Gulenist movement leh dan pawna hnawla Kurdistan Workers' Party (PKK) nena inzawmna neia puhin man a ni. An puhnaah hian thiam loh chantir a nih chuan kum 35 thleng tan tir theih a ni ang. Mahse Brunson chuan an puhna hi thu dik lo niin a sawi.

Nilaini khan Brunson hi a hriselna ṭhat loh vangin jail aṭanga lachhuakin, in-ah pawn chhuak thei loa hren a ni. Mahse US Secretary of State Mike Pompeo chuan hei hi a la tawk lo tih a sawi.

Pastor Brunson man a nih chungchangah Kristian ruh tak, vice president Mike Pence hi a ṭawngchhuak na thei hle a, a twitter-ah chhuah tura Turkey a phutna leh chhuah a nih loh chuan a nghawng na tak hmachhawn tura inbuatsaih tura a vauna thute pawh ṭum eng emaw zat a ziak a ni.