Coronavirus vangin Beijing dinhmun a ngaihtuahawm
China ram khawpui, Beijing-a Xinfaldi wholesale food market-ah coronavirus kai hmuh belh leh an nih avangin Beijing dinhmun chu a ngaihtuahawm hle niin health official-ten an sawi.
China sorkarin hri leng darh tur venna atana test runpui leh kharkhipna khauh taka a kalpui avangin hri leng pawh hi an thunun ṭha tawh hle nia ngaih a ni. Mahse tunhnai ni nga chhungin hri kai hi 106 hmuh chhuah thar an ni leh a, hengte hi Xinfadi wholesale market aṭanga kai nia ngaih a ni. Hei vang hian khawpuia chengte test runpui neihsak mek an nih bakah, hmun 30 chu khar a ni bawk.
Beijing sorkar thupuangtu, Xu Hejian chuan khawpuia hri leng dinhmun chu a ṭha lo hle nia saiwin, hri leng thawh hnihna a thlen an hlauthawng hle. Nimin khan khawpui chhunga thlai zawrhna bazar 276 chu kah thlianghlim an ni a, bazar 11 khar sak niin, chaw leh in tur lam zawrhna dawr 33,000 pawh kah thianghliam an ni bawk.
Official-te chuan hri kai an hmuh tharna, Xinfadi market chu May 30 hnu lam khan mi nuai hnih velin an tlawh hman tih an sawi. Xinfadi-a thawktu mi 8,000 chuang chu test an ni tawh a, quarantine centre-ah dah an ni.