Myanmar court-in Suu Kyi laka thutlukna puan hun tur sawn

Myanmar court chuan an ram hruaitu hlui, Aung San Suu Kyi-i thubuai ṭhenkhata thutlukna a puan hun chu December 27-ah a sawn hla.

February 1-a sipaiten civil sorkar thuneihna an hnehchhuh hnuah kum 76 mi, Suu Kyi hi pawn chhuak thei loin hren a ni zui a, thubuai eng emaw zat siamsak a ni tawh. December 6 khan a thubuai pahnih, sipai sorkar dodal tura mipuite fuih leh coronavirus rules bawhchhiaah puhnaah thiam loh chantirin kum hnih ve ve, kum li tang turin hremna pek a ni. Mahse a hnuah a hremna hi kum hnihah tihhniam sak a ni a, jail-a tang loin hren a nih mekna hmunah a tan hun tur hi a tlak phalsak a ni.

Nimin khan a thubuai dang pahnih, phalna nei loa ram dang siam walkie-talkie leh signal jammer set kawla puh chungchangah court-in thutlukna a siam hun tur a ni. Mahse a hun hi sawnhlat a ni ta thung a, sawn a nih chhan hi judge-ten an sawilang lo. Heng thubuai pahnihah hian thiam loh chantir a nih chuan kum thum leh kum khat jail-ah tantir theih a ni ang.

Suu Kyi hi sipai sorkarin thubuai a siamsak hrang hrangah hian thiam loh chantir vek a nih chuan kum 100 chuang jail-ah tantir theih a ni dawn a ni. Mahse an puhnate hi thu dik lo a nih vek tih Suu Kyi chuan a sawi thung a, amah thlawptute pawhin an political career tihchhiat tuma sipaiten an beihna, thu belhchian dawl lo a ni tih an sawi bawk.