EU ramte hnenah Omicron do nan vaccine dose mtd 20 pe dawn

European Union (EU) member ramte hnenah hri darh chak tak Omicron variant venna atan nakkum kumtir lam thla thum chhungin Pfizer-BioNTech vaccine dose maktaduai 20 pek a ni dawn tih European Commission chuan Pathianni khan a puang.

"Commission chuan EU ramten tun aṭanga kar reilo te chhunga chak zawka mRNA vaccine an semchhuah theihnan, BioNTech-Pfizer nen vawiin khan inremna a siam a ni, " tiin thuchhuahah hian an tarlang. Nakkum January thla hian dose maktaduai nga an semchhuak ang a, February-ah dose maktaduai nga dang semchhuak lehin, March thlaah dose maktaduai 10 semchhuak turin ruahmanna an siam.

BioNTech-Pfizer te'n vaccine dose maktaduai 195 semchhuak tura ruahmanna an lo neihsa tawhte nen, kumtir lam thla thum chhunga an dose semchhuah zat tur belhkhawm hi maktaduai 215 a tling dawn ta a ni.

Kar liamta Ningani khan Moderna chuan EU ramte hnenah chak zawka mRNA vaccine semchhuak turin thupek an lo tichhuak tawh bawk.

"European Union ramah tun hnaia hri kaiin zual lam a pan zel avangin vaccine dose kima lak leh booster pekchhuah chu EU chuan a ngai pawimawh hle a ni," tiin Commission chuan a sawi.

Europe hi a ṭum hnihna atana Covid-19 lenna hmunpui a ni chho leh mek a, Covid hri thar Omicron variant kai hmuh chhuah pawh an pung chak chho leh tawh hle a ni.