North Korea-in demilitarised zone-ah sipai thawn luh tum

North Korea leh South Korea, ram pahnihte ṭhen hrangtu demilitarised zone (DMZ)-ah North Korea sipai lama thuneitute chuan an ram sipai thawnluh an tum thu  nimin khan an tarlang. 

Kar liam ta Inrinni khan North Korea hotupa Kim Jong-un farnu Kim Yo-jong chuan South Korea laka sipai chakna hmanah a lo vau tawh a, demilitarised zone-a an ram sipaite thawn luh a ngaih thu a sawi bawk. Hemi bawhzui hian NKorea General Staff department chuan nimin khan demilitarised zone-a indo a awm palh thilah sipaite chu hma lak dan tur an zirtir thu leh he lai hmunah hian an sipaite chu thawn luh an ngaih thu a tarlang zui ve ta a ni.

Hemi chungchang hi South Korea defence ministry chuan nimin vek khan chhang letin, US an thawhpui thu leh demilitarised zone-ah an ram sipaite awm belh tir an tum ve bawk tih a sawi. 

SKorea-a pawl ṭhenkhatin balloon hmangin NKorea sawiselna leh demna lehkha chu NKorea ramah an thehdarh ṭhin a,  he balloon-ah hian lehkha bakah chaw, US dollar 1, radio, USB stick, Skorean drama leh chanchintharte dah tel a ni bawk ṭhin. 

Tun hnai khan NKorea lamah hian NKorea sawiselna leh demna lehkha hmuh leh a ni a, hei vang hian NKorea chu a thinrim hle a ni. He thil thleng hi tihtawp a nih theih nan ram pahnihte chuan kum 2018 khan inter-Korean agreement an lo ziak tawh a, he inremna hi SKorea president President Moon leh Kim Jong Un ten an ziak a ni. 

Pawl ṭhenkhatte thil tih hi Skorea lam chuan khap a nih theih nan hma an lak tur thu a tiam bawk. 

SKorea hian US a ṭan tlat avang leh ṭanpuina a pek ṭhin an la thlawp zel avangin NKorea chu SKorea lakah hian a lungawi lo hle bawk. Hengte avang hian NKorea chuan SKorea hrekna tur a ngaihtuah a, kar liam ta khan NKorea chuan SKorea nena an inbiakpawhna zawng zawng a tihtawp vek bakah, ram pahnih hruaituten an hman hotline pawh a titawp a ni.