US-in Tibet special coordinator thar tur ruat

US sorkar chuan Tibet special coordinator thar atan Thawhṭanni khan veteran diplomat Uzsra Zeya a ruat.

State department chuan coordinator thar atana ruat, Uza Zeya hi civilian security, democracy and human rights-a undersecretary ni chungin, Tibet chungchang buaipui tur hian ruat a ni tel tih a sawi. China leh Tibet sakhaw hotu, Dalai Lama-te inkar boruak siamṭhat dan ngaihtuaha inbiakna an neih theih dan turte buaipuiin, Tibet mipute dikna chanvo leh zalennate humhalhna turin a bei dawn bawk a ni, a ti.

Tibet coordinator office hi State Department hnuaiah awmin, Tibetan Policy Act of 2002 hnuaiah din a ni. Donald Trump a Preident lai hian kum thum chhung he post hi dah ruah a ni a, nikum khan secretary of state hlui Mike Pompeo chuan he post chelh tur hian Robert Destro a ruat a, China lamin an sawisel nghal a ni. China chuan Tibet hi a ram chinah a chhal avangin US-in Tibet chungchang buaipuitu tur a ruat hi an ram inrelbawlnaa inrawlhna tiin a sawisel fo a ni.

US President atana Joe Biden lakluh a nih hnu lawkah Robert Destro hian a hna a chawlhsan a, hun rei tak hnawhkhah loha a awm hnuah Thawhṭanni khan Tibet special coordinator thar hi ruat a ni leh ta a ni.