Brazil president-in a zin tum a ṭhulh

Brazil president Jair Bolsonaro chuan Davos khuaa 'World Economic Forum' hmang tura zin a tum chu a ṭhulh.

Presidential thupuangtu Otavio Rego Barros chuan venhimna chungchang vangin President hian a zin tur hi a ṭhulh tih thuthar thehdarhtute hnenah a sawi a, US leh Iran inkar boruak chhiat vanga ṭhulh a ni lo, a ti.

World Economic Forum vawi 50-na hi Switzerland-a Davos khuaah January 21-24 chhung hian neih a ni dawn a, forum thupui (theme) atan "Stakeholders for a Cohesive and Sustainable World" tih an hmang dawn bawk.

He hunah hian khawvel hmun hrang hrang aṭangin palai 3,000 chuang an kal khawm beisei a ni a, 'Paris agreement' leh 'Sustainable Development Goals'-te pawh sawi ho tura tih a ni. Heng bakah hian Ecology, Economy, Technology, Society, Geopolitics leh Industry lamte pawh sawi ho tur pawimawh zingah a tel.