Nawaz Sharif-a Islamabad hospital-ah dah lut

Pakistan Prime Minister hlui, eiruk thubuai vanga Rawalpindi-a Adiala Jail-a tang mek, Nawaz Sharif-a chu a hriselna ṭhat loh vangin Islamabad-a Pakistan Institute of Medical Sciences-ah dah luh a ni.

Nawaz Sharif-a hriselna endiktu, doctor-te chuan a kal a ṭha lo a, a tanna jail-a health centre-ah enkawlna tur hi a awm loh vangin damdawi-inah dah a ngai tih an lo sawi tawh a ni. Mahse Sharif-a hian jail-a aṭanga lakchhuah a duh lo a, jail chhunga enkawl mai turin a ti a ni. Mahse a hriselna dinhmun hi a tlakhniam zel avangin Pathianni khan Islamabad damdawi-ina sawn tur hian tih a ni a, nimin khan hruai a ni ta a ni.

Sharif-a hi a sugar level a sang hle a, a taksa a hah bawk avangin a chau hle nia sawi a ni. Hei bakah hian a thisen kal a dik tawk loh vangin a kut pahnih a na bawk niin doctor-te chuan an sawi.

Sharif-a leh a fanu, Maryam leh a makpa Muhammad Sadfar-te hi Avenfield properties thubuaia thiam loh chantir an nih vangin London aṭanga Lahore-a an kir chu airport-ah man nghal an ni a, Rawalpindi-a Adiala Jail-ah dah nghal an ni. Sharif-a hi a thubuaiah hian kum 10 tang tura hrem a ni.