Immigration law vangin Trump-an US sorkar kharah vau

US President Donald Trump chuan a kaihhruai sorkarin immigration law siamṭhat a tumna chu Democrats lamin an thlawp duh lo a nih chuan US sorkar khar (shutdown)-ah a vau.

President Trump chuan hemi chungchang hi a twitter-ah ziak langin, "Democrats lamin Border Security atan hian vote min pe duh loh a nih chuan sorkar khar mai hi ka pawiti dawn lo a, hei hian Wall pawh a huam dawn a ni! Lottery, Catch & Release etc te hi kan tihbo a, merit based-a Immigration system kan kalpui a ngai tawh. Kan ramah hian mi ṭha tak tak rawn lut turin kan mamawh a ni", a ti.

Trump hian an rama pemlutte chungchanga dan siam chu pass turin Congress a duh a ni. Congress-ah hian Republican tam zawk mah se, party chhungah dan siamṭhat tum chungchangah moderate leh conservative-te ngaihdan a phir avangin an la pass thei lo a ni. Kar hmasa khan conservative Republican te thlawp immigration bill hi ngaihtuah ni mah se a tlang zo lo. Trump chuan US chhim lama Mexico nena an ramri hungna bang siamna turin dollar tluklehdingawn 25 a dil a ni.

US House Speaker Paul Ryan chuan ramri hungna bang siamna tur hian dollar tluklehdingawn 1.6 pek a nih tawh tih sawiin, lawmaker-te chuan a bakah dollar tluklehdingawn 5 dilna hi an la ngaihtuah mek tih a sawi.