Zimbabwe-ah inthlanpui nei

Zimbabwe ram President, Parliament leh local election chu nimin khan neih a ni a, vote nei mi maktaduai 5.6 an awm. Inthlan result hi August 4-ah puan a ni ang.

President inthlanna atana candidate te chu president ṭanglai, Zanu-PF party candidate Emmerson Mnangagwa leh eptu hruaitu Nelson Chamisa te an ni. Kum sawmli hnuah an ram hruaitu hlui, Robert Mugabe tel lohna inthlan an neih ṭum khatna a ni. Mugabe hi nikum khan sipai chakna hmangin president a nihna aṭanga paihthlak a ni.

Zimbabwe-in independence a hmuh hnua kum 1980-a thuneihna changtu, president hlui Robert Mugabe chuan amah thlaktu, Emmerson Mnangagwa chu a vote dawn loh thu a sawi. Kum 94 mi Mugabe chuan amah paihthlatu sipai thlawp sorkar chu mipuite chuan paihthla se a duh thu sawiin, a party hlui Zanu-PF chu chak lo se a duh thu a sawi.

President thlannaah hian president ṭanglai, kum 75 mi Emmerson Mnangagwa chu sipaiten an thlawp bawk avangin a chet ṭhat hle rin a ni a, hetihlai hian amah khingtu eptu pawl candidate kum 40, Chamisa chu campaign laiin a che ṭha hle thung a, ṭhalai lamin an vote nasat rin a ni. Campaign laia mipuite ngaihdan lakah Mnangagwa hi sang zawk mah sen an inthlau lo thei hle.