Ram 3-ah Omicron vanga thi awm tawh

Ram pathumah Omicron variant thihpui an awm tawh a, expert-te chuan hri thihpui hi an la pung zel dawn niin an sawi.

UK-ah Omicron kai thihpui hi mi 12 an awm tawh a, US-ah mi pakhatin thihpuiin, Israel-ah Thawhlehni khan Omicron kai pakhat a thi ve leh a ni.

Khawvel ram hrang hrangah Omicron variant hi a darh zel a,a bikin Europe ramah a darh nasa tawh hle. Hei vang hian EU ram hrang hrangte chuan inkhuahkhirhnate pawh an kalpui leh ṭan a, Krismas leh Kum Thar vuakveta mipuite chu fimkhur tura chahin, punkhawm khapnate pawh an siam leh a ni. European Centre for Disease Prevention and Control (ECDC) chuan hunpui lo thleng tura punkhawmna buatsaih chuan hri hi nasa takin a tidarh thei a ni tih sawiin, hri kai damdawi-in panpui ngai leh thihpui pawh an lo chhut lawk aiin an tam zawk dawn nia a lan thu an sawi.