Israel-in Covid-19 vaccine dose lina pe dawn

Israel chuan coronavirus Omicron variant darh zel tur venna atan health worker leh kum 60 chunglamte tan Covid-19 vaccine dose lina pek an ni dawn tih a sawi.

Health Ministry expert panel chuan vaccine dose lina pek rawtna an siam, Prime minister Naftali Bennett-a'n a lo pawmpui nghal chu "Khawvel huapa Omicron darh zel tur venna kawngah thu lawmawm tak a ni" a ti.

"Israel mipuite hi khawvel ram zinga Covid-19 vaccine dose thumna la thei hmasa ber an ni a, kan hmalaknate chhunzawmin dose lina pawh pekchhuah vat kan tum a ni," tiin dose la thei china an tarlante chu a rang thei ang bera vaccine la turin PM chuan a sawm.

Israel Health Ministry chuan thuchhuah siamin, natna dona chak tawk lo te, kum upa zawk leh medical team-te chuan vaccine dose thumna an lak aṭanga thla li hnuah dose lina hi an la thei tih a sawi.

Vaccine dose lina pek chungchanga thutlukna hi Thawhlehnia Israel rama Omicron variant kai thihpui a awm hnuah siam a ni. Mahse Omicron vanga thi hi natna dang tam tak neisa nia sawi a ni.

Thawhlehni khan Israel-ah Omicron vanga thi hmasa ber hi awmin, Beersheba-a Soroka Medical Center chuan coronavirus ward-a an dahluh aṭanga kar hnih hnuah a thi tih an sawi. Mahse a thih chhan ber hi natna dang a neih sa vang niin, coronavirus vanga thawk lama harsatna a neih vang a ni lo, a ti.

Israel-ah Thawhlehni thleng khan Omicron kai hmuh chhuah mi 340 chuang an awm tawh tih Health Ministry chuan a sawi.

Hri darh zel tur venna atan hian United States, Germany, Italy, Turkey leh Canada ramte aṭanga zin luh a khap tawh bawk. Shopping mall-a thil eite khapin, naupang natna nei sa leh vaccine la tlemna biala chengte chu in lam aṭanga lehkha zir chhunzawm turin a ti bawk. Hei bakah hian public sector office-te pawh thawktu 50% chin kal turin a ti bawk a ni.

Defence minister Benny Gantz chuan Homefront Command te chu nitin hri kai thar mi 5,000 chuang awm tura anga inbuatsaih lawk turin a chah.

Israel mipui maktaduai 9.3 vel zinga mi maktaduai 4.1 te chuan coronavirus vaccine dose thumna an la tawh a ni. Hetih lai hian tleirawl leh naupang lamah vaccine la hi an la tlem hle a, kum 5-11 inkar vaccine dose khatna la hi 1% pawh an la tling lo a ni.