US-in mi mtd 500 home test neihna tur pe dawn
United States-a Covid-19 darh zel karah President Joe Biden chuan hri inkaidarh dan chah dan tur kawng hrang hrang siamin, heng zingah hian home testing tam zawk neih te, vaccine lakna tam zawk siam leh Covid vanga harsatna tawk damdawi-in ṭanpuina pekte a ni.
Biden chuan Thawhlehni khan thlasik chhunga an hmachhawp te tarlangin, America mi vaccine la lo te chu vaccine la turin a ngen nawn leh a ni. Omicron variant chu coronavirus strain dangte aiin a darh chak zawk a, vaccine hian he hri an la na lutuk tur leh thihna lakah a veng chhunzawm zel tih a sawi.
"Vaccine dose kima in la lak loh chuan, ngaihṭhatlohna tur lian tak in nei a ni," tiin "Dam loh theihna lian tak in nei a, in damlo a nih chuan in ṭhiante, in chhungte leh midang in kaichhawng thei a ni. Heng karah hian vaccine la la lote chuan damdawi-ina enkawl emaw thihpui emaw hial theihna an nei a ni," tiin Biden chuan a sawi.
US-ah coronavirus inkaichhawn awlsam zawk Omicron strain a darh mek avangin he ruahmanna thar hi siam a ni a, World Health Organization (WHO) chuan thla hmasa khan “variant of concern"-ah an lo puang tawh bawk.
WHO chuan Thawhṭanni khan Delta variant aiin Omicron hi a darh chak zawk tih finfiahna an hmuh tawh thu a sawi. "Vaccine dose kima la tawh emaw Covid-19 kai dama puan tawhte pawhin an kai nawn leh thei a ni," tiin WHO Director-General Tedros Adhanom Ghebreyesus chuan a sawi a ni.
US-ah hian hri kai thar aṭanga 73% chu Omicron kai an nih thu US Centers for Disease Control and Prevention (CDC) chuan a sawi a, hei vang hian US khawpuite chu khauh zawka inkhuahkhirhna dan siam tur leh inchhunga mask vuahna tur thupek pawh lekkawh leh turin ngen an ni bawk.
US mipui maktaduai 204 chuangin Covid vaccine dose kimin an la tawh tih CDC data chuan a tarlang a, an zinga mi maktaduai 60.8 te chuan booster dose an la tawh bawk a ni.
President Biden chuan Thawhlehni khan vaccine lak tur tam tak awm mah se mi maktaduai tel chu vaccine la loin an la awm thu leh, Omicron darh zel tur venna atan health official te aṭanga America mipuite vaccine la tura ngenna vawi tam tak an dawn tawh thu a sawi.
Hri darh zel ven dan turte sawiin, Biden chuan mahni in lam in testna tur hmanrua maktaduai 500 an lei tur thu leh, nakkum January thla aṭangin hengte hi a thlawna lak a nih theih tur thu a sawi. Hei bakah hian sorkar chuan a remchanna hmun apiangah testing site an siam belh zel tur thu a sawi bawk.
"Omicron hi inkaichhawn a awlsam em avang leh a bikin vaccine la la lo zinga a nasat zual avangin, tunge hri kai tih kan hriat a pawimawh hle a ni, chuvang chuan test tam zawk kan tih a ngai dawn a ni" a ti.
President chuan puitling booster dose la thei chin chu la vek tur leh hei hian hri laka a venhim zual tur thu a sawi bawk.
"Booster dose la ula, mask vuah rawh u," tiin Biden chuan an ram mipuite a ngen. "Kan doctor-te hian booster dose-in invenna chak ṭha ber a pe thei tih an puang tawh a ni. Vanduaithlak takin booster dose la thei, mahse la la lo mi maktaduai 10 chuang an awm a ni" a ti. Thla ruk liam taa vaccine dose hnihna la tawhte chuan booster dose hi an la thei a ni.
Omicron darh mek vang hian US-a damdawi-inte chuan, coronavirus kai damlote hi an enkawl zo lo mai ang tih an hlauhthawng ṭan tawh a ni. National Institute of Allergy and Infectious Diseases director Dr Anthony Fauci chuan Omicron darh chak dan chu mak danglam tak mai a nih thu a lo sawilang tawh a ni.
"Khawvelah a kangkai mek a ni," tiin Fauci chuan a sawi a, US-a damdawi-inte chu tunkar chho hian hri kai an pun chhoh theih avangin a lun hle a rin thu a sawi a, a bikin vaccine la tlemna hmuna damdawi-inte chu a tuar na ber tur an ni thei tih a sawi.
Biden chuan Thawhlehni khan an sorkar chuan US sipai leh health worker te ruaiin, damdawi-inte ṭanpui turin hma an la dawn tih an sawi. Federal Emergency Management Agency (FEMA) chu Covid-19 kai tamna hmun, New York leh Maine hmarchhak lam state a damdawi-in khum dahbelh turin thu a pek tawh thu a sawi. "Kan doctor, nurse, hospital staff te chuan hripui len chhung hian rim takin hna an thawk a ni. Strain thar a lo darh leh avangin theihtawpa kan puih an ngai a ni. An hnungah dingin kan thlawp zel dawn tih kan hriattir tur a ni," tiin President Biden chuan a sawi a ni.