Myanmar sipaiten beihpui an thlaknaah civil mi 9 ruang hmuh a ni

Myanmar sipaiten thlawhtheihna hmanga beihpui an thlaknaah ruang pakua chhar a ni a, an zingah hian naupang pahnih an tel niin Myanmar Now chuan a sawi.

Sipaiten beihpui an thlak hnuah, Magway biala Hnan Khar khaw daiah Thawhlehni khan ruang hi chhar an ni a, an zinga pahnih chauh hi sipaite dodaltu pawl, self-defence force mi niin midangte chu khawchhung mite an ni.

Helicopter hmangin sipai sorkar dodaltute dapchhuah leh beih hna hi an kalpui ṭhin nia sawi a ni. Magway biala eptu lamte an beihnaah hian helicopter pathum an hmang a, helicopter aṭangin khawchhung mite hi an pawng kah tih niin khawchhung mite chuan an sawi. Kar liam ta Zirtawpni khan sipaite hian helicopter leh jet fighter hmangin Sagain bial an lo bei tawh bawk.

February 1-a sipaiten civil sorkar thuneihna hnehchhuh a, rorelna an chan hnuah mipuiten sipai sorkar duh lohna an lantir chhunzawm reng a, hei bakah hian sipaite do let tur hian people's defence force (PDF) pawh din a ni bawk. Heng mite hi sipaite chuan bei letin, sipai rorelna duhlotu zinga mi 1,300 chuang an kaphlum tawh niin monitoring group chuan a tarlang.

Sipai thupuangtu, Zaw Min Tun chuan sipaite hian sorkar dodaltute dapchhuahna atan helicopter hi an hmang ngei tih a sawi a, mahse beihpui an thlaknaah hian thi an awm hriat a nih loh thu a sawi.

Tun thla tir lam khan sipaite hian Sagaing bial an beihnaah Dontaw khaw mi 11 an kaphlum nia sawi a ni a, he thil thleng hi United States leh United Nations chuan an dem thu pawh an sawi a ni. Mahse sipaite hian thu dik lo a ni tih an sawi thung.

Sipaite hi Karen helpawl, Karen National Union (KNU) nen pawh tun hnaiah an inbei ngawrh hle a, an inbeihna avang hian Karen state aṭangin mi 3,900 vel chu Thailand ramah an tlanchhe tawh a ni. UN refugee agency, UNHCR chuan Thailand sorkar hnenah Myanmar raltlante hi luh phalsak zel turin a lo ngen tawh bawk.