Economy rate 2.5%-in a ṭhang dawn : World Bank

World Bank chuan kumin chhunga khawvel economy (global economy) ṭhanna tur rate chu 2.5% a nih tur thu, Nilainia 'Global Economic Prospects report' a tihchhuahah a tarlang.

Nikum June thla khan World Bank hian kum 2020-a economy ṭhanna tur rate chu 2.7% niin a tarlang a, mahse kumina an tihchhuah tharah hi chuan 2.5%-in a ṭhang dawn tih a tarlang leh ta zawk a ni. Kum 2008-a khawvel puma economy thlakchhiatna (global financial crisis) a thlen hnuah, nikum kha khawvel puma economy ṭhanna rate hniam ber ṭum a ni a, 2.4 % a ni. Zawi muanga a ṭhan chhoh leh beisei a ni a, kum 2022-ah chuan 2.7%-a kai phak leh tawh rin a ni bawk.

India, Brazil, Mexico, Russia, Saudi Arabia leh Turkey-te chu nikuma economy harsatna tawk nasa zual ram an ni a, kuminah erawh hma an sawn hret rin a ni. Ram ṭhang mek (emerging economies)-te hi nikum khan an economy ṭhanna rate hi 4.1 % niin, kum hian 4.3%-a a san chho rin a ni. Hetihrual hian economy nghialnghet zawk ram- US, Europe leh Japan-te chu kumin hian an 'global trade' 1.4%-in a hniam dawn niin World Bank report chuan a tarlang.

World Bank-ah hian member ram 189 an awm a, heng zinga a tam ber hi United Nations (UN) member an ni bawk. UN-ah hian member ram 193 a awm mek a, observer ram pahnih an awm bawk a ni.